နှစ်ပတ်လည်
လက်ဖျားထဲ အနွေးဓါတ်တွေဝေ့နေ
ဒီဇင်ဘာဟာဘယ်လောက်အေးအေး
ကိုယ်တို့နွေးခဲ့တာ
ရှင်နဲ့ကျမကနေ
မောင် နဲ့ ချစ်
နောက်ပြီး
ဖေကြီးနဲ့မေကြီး
ဒီဇင်ဘာဟာ ဘယ်လောက်အေးအေး
ကိုယ်တို့နွေးခဲ့တာ
ချစ်ခြင်းမေတ္တာကို
နှစ်ဦးစလုံးမယုံကြည်ပါဘူး
ဒါပေမဲ့
ကိုယ်တို့ရူးရူးမိုက်မိုက်
ချစ်နေတုန်းမဟုတ်လား
လက်သည်းတွေလို
မသန့်တော့တဲ့အစိတ်ပိုင်းတွေ
ဖြတ်ထုတ်
ရုပ်ဆိုးတဲ့ပုံစံတွေလှီးထုတ်
ကိုယ်တို့တစ်ယောက်လက်သည်းခွံမှာတစ်ယောက်
ဘ၀ပုံလေးတွေဆွဲရအောင်
ကိုယ့်ပုခုံးတစ်ဖက်လွတ်နေသလို
သူ့လက်တစ်စုံလည်းအေးနေမှာပဲ
ကိုယ်သိတယ်
ကိုယ်တို့ရင်ခွင်နှစ်စုံတော့
နွေးနေဖို့ လိုတယ်
ဘယ်လောက်အေးအေးပါ
ကဗျာတွေလည်းနှစ်ပတ်လည်ပြီ
နားလည်မှုတွေလည်းနှစ်ပတ်လည်ပြီ
ကိုယ်တို့ချင်း နွေးနွေးထွေးထွေး
သိမ်းပိုက်ဖို့
အလံတွေဖွက်မထားစေချင်ဘူး
တစ်ရက်ချင်းနီးဖို့
စာသားတွေသက်သေရှိပါတယ်
ယုံကြည်မှုဆိုတာ
ဘယ်လိုမှမျက်လှည့်ပြလို့မရဘူး
မိနစ်ကိုးဆယ်အကွာဆိုတာ
မောက်စ်တစ်ရွေ့စာပဲရှိတယ်ဆိုတာ
ယုံလား …
သူ့ခေါင်းပေါ်က လ နဲ့
ကိုယ့်ခေါင်းပေါ်က လ တူတူပဲ
မသေချာရင် ခုပဲမော့ကြည့်
ချစ်လားလို့
မေးလိမ့်မယ်
မရှက်နဲ့
အကျယ်ကြီးအော်လိုက်
ကြားလား ကြားလား
ပြောစရာစကားမရှိတော့တာမဟုတ်ဘူး
အပြည့်အ၀နားလည်သွားတာ
အများကြီးမတွေးနဲ့
ယုံလိုက်
ကြည်လာလိမ့်မယ်
ဒါ နှစ်ပတ်လည်
ဆန်တာကလော့စ်ကို
ကိုယ့်ကိုယ်စားလွှတ်လိုက်တယ်
နွေးနွေးထွေးထွေးရှိပါစေ ။
မောင်အောင်ပြည့်
18.12.13
No comments:
Post a Comment